مظاهر السلوى / الشاعر عائض الثبيتي

Views: 3

مظاهر السّلوى ( شعبيات )

للنار مِيزهْ والثّرى والمصلّى
في فسحة الوادي ، ورا مَدهَل السّيْل

أبْدي لها من خاطريْ مُسْتَهَلّا
بيني وبين السالفهْ مربط الخَيْل

ينجال همّي بالخلا واتسلّى
واقول يا والي ويا صاحب الحَيْل

حبل الأملْ لو من عروشهْ تدلّى
إن ما وقعْ بالكفّ ما يحصُل النَّيْل

يشدّني للماضيَ اللي تولّى
عهد الوفا في كامل الوزْن والكَيْل

عندي شراب الما وشاهي محلّى
والقهوة السّمْرا على حبّة الهَيْل

أغلى طلبْ ، واللي بطبْعهْ تغلّى
في عذره الواسعْ ، ومن دونه الليْل

مادام عن بعض المواقفْ تخلُى
يقفي وهو مَعفي من الحَطّ والشّيْل

في شوفة البدر المنير المُجَلّى
ما يكفي الحاجهْ ويغني عن اسْهَيْل

من لا بهندام الجمايلْ تحلّى
يَعرى ولو يختال في مُسْبَل الذَّيْل

ما تنفعهْ كِلْمةْ (بلى) (لا) و(كلّا)
بعد الفوات العذْر ما يعدل المَيْل

عائض الثبيتي