عتابا /الشاعرة ماجدة العلواني

Views: 1

❤️❤️❤️عتابا❤️❤️❤️

كتبت ماجدة العلواني الكيلاني

دمنا يرخص لأرضنا و…جبلنا
وع محبة الوطن الله… جبلنا
العز عطانا وخيرو جاب لنا
ونحن للوطن أوفى الحباب

فأجابني أبو محمود درباك
حتى العتابا ياسيدة الأدب والشعر

تعلمتي فنون الشعر كلا
ولا يوما فكرك من النظم كلا
سألت هل وجد مثلك؟ قال كلا
الهي كونا وسكر الباب

فأجبته

ابو محمود و يا درباك
دمعي من عيني دُر..باك
و بقليبي لجعلو دربك
الهي يحميك يا أغلى الشباب

وقال المختار عدنان أحمد كبيسي

ياطير اللي ترفرف عا جبلننا
نحنا بالوفى الله جبلنا
اخدت الروح بس انتا جبلنا
رساله حب من زين الشباب

قال الشاعر محمد عصام علوش
ونحنا بالوطن والله كبرنا
وما في بالدني برن ك برنا
ولا في الناس مين بروا ك برنا
وصار الوطن عنا قمر وكتاب

(بر: الأولى بفتح الباءاليابسة، والثانية بكسرها من البر وهو رد المعروف

أجاب Majed Yasmeen
علىٰ روح القصيد والثقا فيه
بقلبي حروف منك وثقا فيه
غير الشعر يكتب والثقا فيه
ما كان الشاعر بعمرو كتب

قال محسن المنصور
الورد والوفا.. صاروا بوادينا
زهور الحب. . لحباب. .وَدَّيْـنا
نحنا قتلنا الشوق ياريح ودّينا.
ع مطرح اللي اتغربوا. فيه الحباب..
و الشاعر عبد الجليل اللكن

دروب الحب لَديارَك عبَرتا
وجفون العين عم تذرف عَبرتا
أماني تقول ياغالي عِبَر تا
يِحلى السهَر ياأغلى الحباب