الشاعرة مرفت جابر / عيش براحتك

Views: 2

عيش براحتك
كلمات مرفت جابر
…………….
عيش براحتك بس حاول
تبقى راحتك هيّ راحتي
واوعى تزعل من صراحتي
لمّا اقولك قلبي مل
مش ح اكون ف الحب ضِل
مش ح اعيش بغرامي هامش
طول ما طير الحب كامش
جوّه قلبك وانت ساجنه
قلبي مش ح يسيب مساكنه
لجل ترميه خلف ضهرك
لسّه قلبي بنبضه فاكرك
بس رح يصبر لإمتى؟
كل يوم يحلم ولكن
لسّه إنت زي ما انت
حبّي مش ح يكون ( جاكتّه )

تسترك وقت اللزوم
حبّي كوم والدنيا كوم
يعني مش ح يكون عياقه
كل قلب وعنده طاقه
لو يفيض الكيل خلاص
وامّا يتهد الأساس
مش ح يقبل يبقى عاله
واستحاله يكون كماله
أو ما يبقاش يوم أساسي
وان غاويت لعب الكراسي
رح تكون برّه المسابقه
وقت صدّك قلبي أبقى
وقت هزلك قلبي جد
تبني سد ح يبني سد
بس سدّي ح يبقى أعلا
مش ح تكسب ف المعادله

حتى لو عامل حسابك
مش ح تاخد غير منابك
إللي حتماً يبقى ناقص
كل فعل ورد فعله
ف اتجاهه يكون معاكس
يعني مش ح تشوف نوارس
وانت غيمه بترمي مطره
مش ح تلقى عبير ورودي
وانت قلبك ارض صحرا
رح تلاقي السكّه خطره
والخطاوي ماشيه ضدّك
عيش براحتك
……………………………..