الشاعر هاني داوود / حين ماتت أمي

Views: 3

حين ماتت أمى …
ولدت هذه الكلمات

الف باء الحياه
أمى ياقصة حياه
من قلبى بارويها
أمى ياجنة أمل
وأحلى مافيها
الف باء الحياه
وكل معانيها

كلامك كتاب بأقراه
الذكرى فيه و معاه
اصرخ وأنا جواه
أصرخ واقول ااه
واحشانى يا أمى
لساك فى دمى
دنيتى عندك
جنتى حضنك

كدبه كبيره ..
عشتها وصدقتها
انى بافهم …
واعرف اكتر منها
دنيا من بعدها
شربت قساوة مرها
وماتت . …
ماتت معاها حياتى كلها

لسه فاكر كل كلمه
صرخت فيها وقلتها …………

انتِ ليه ؟؟
انتِ ليه يا امى جبتينى ليه ؟؟
جبتينى ليه ؟؟
للدنيا ومافيها
والظلم ماليها
ليه أبويا مش غنى
ومعايا كام مليون
واعيش مقضيها ؟؟
جبتينى ليه لديب مسعور
يعذب فيا .. يذلنى ويجور ؟؟
لسه فاكر كل كلمه
بحكمه قلتيها …………

ليه ياولدى ملفوف بأحزانك
ليه دمعتك وشكوتك وأشجانك
انت جيت الدنيا حافى
أصبر ماتبقاش جافى
حمل همومك على كتافى
أمحى ألوان شياطينك.
سجل أشعارك.. دواوينك
وبص للسما …
وادعى ..
ربنا يعينك
يرزقك صحه وستر
ويعزك ولا يهينك

لسه فاكر كل كلمه
صرخت فيك وقلتها …………

ياملاك الموت تعجل
خدنى من غيرماتسأل
شهقتى وقلتيلى ..
حياتك يابنى ماتكفرش بيها
التفت وقلتلك
حياتى ؟؟
هى فين حياتى
عشان اجيها ؟؟؟
ماتتكلميش يا أمى
أنت أصلك ماتعرفيش
كفايه ماتنصحيش
تعبت ..ماتبصليش
زهقت …..
مابتزهقيش ؟؟؟؟

ساعتها قلتيلى …..
يابنى اصبر ماتتخنقش
انت ضعيف
لكن بايمانك قوى
مع ربنا ماتخافش
ماتزعلنيش
ولاتغضبنيش
ولاِتبَكًى يوم عنيا منك
حاتسعد كتيريابنى
ويا ما بيروح فى الريش بقشيش
انا…
انا مسيرى يوم حاموت
مش حاخلد فى الدنيا واعيش
نصيحتى ليك اصبر ماتفتريش
وأرضينى دايما ولاتغضبنيش
صرخت فيك وقلتلك
المووووت .. المووووت
تانى ….تااااانى الموت
تانى حكم ودروس ؟
…..عايز فلوس
عايز زى باقى الخلق أعيش
ساعتها كانت نظرتك
وخدتى من تحت مخدتك
خد يابنى..
بس لخاطرى ماتزعلنيش
حاسه انى عن قريب راح اموت
ماتخوفنيش
وماتقهرنيش ..

وأنا ساعتها
وبكل قسوه قلتلك
يااااااااه ياأمى كلنا حانموت
مين فينا مخلد
مين فينا ..
عايز فى القَرفه دى يعيش

كنت عاصى ومش راسى
والغبا عايش فى راسى
ايوه غبا ..
كنت غبى وانانى
سبت حبيبتى تجرى
منى لشط تانى
وكان اليوم الأولانى
يوم ندمى وأحزانى

يوم رجعت لقيتها
دايخه نايمه
بخيالها هايمه
يادوب تفتح عينيها
بصيت لى ..
من غير كلام
يوم من الأيام
كأنه كان …
يوم قيامتى
يوم نهايتى والختام
وصرخت فوقت
م الاوهام والضلام
بكيت بحرقه ..سألت
أنت رايحه فين يا أمى ؟
رايحه فين سايبانى وحدى ؟
حتى وانت رايحه
عنيكى خايفه
مش على نفسك ..عليا
رايحه فين يا أمى ؟؟
صبرك عليا
ياااااااااااارب
يارب أحييها لحظه
تغفرلى ذنبى .. تسامحنى
أعترف بغلطى وتعاتبنى
أو..أو اديها من عمرى عمر تانى
واكون معاها شخص تانى
او حتى عمرى يكون فداها
لكن العمر أنانى ..
دايما أنانى ..
يحب نفسه
واللى يحب نفسه
يعيش بكَسره ….
وبندمه يعانى
ورغم انى يا أمى نفسى اروحلك
إلا ان اللى مزعلنى بس منك
أن ساعة أوضتك
لسه بتدق فى ودانى
ونبض قلبك
نبض تانى
بيعذبنى .. بيعاتبنى
بيهز فى كيانى
فى صحوتى ومنامى
فى صلاتى
فى قيامى
اللى مزعلنى بس منك
إنك …..
ماقلتليش ولا ردتيش
عليا لما سألتك لما تسيبينى
امتى راح ترجعى تانى ؟؟؟
امتى راح ترجعى تانى ؟؟؟
امتى راح ترجعى تانى ؟؟؟

هانى داوود