لحظة / الشاعر مجدي حسن

Views: 13

من ديوانى قلب شاعر
قصيدة / لحظه
كنت فاكر لو قابلتِك
مَره تانيه
مش هنلقا يوم لقانا
غير سلام
كل واحد فينا عاش
فى البُعد دُنيا
واللى كان مابيننا
تاه وسط الزحام
واتقابلنا مَره صُدفه
ايوا كانت احلى صُدفه
شُفت عينى بتجرى وبتحضُن عينيكى
نبض قلبى بينتفض
من شوقُه ليكى
رغم السنين رغم الفراق والبُعد
عاش الحنين فى قلوب بتسكُن بَعض
ندهتلِك بإسمِك ردِت عليّا بنتى
وندهتيلى بإسمى إبنِك عليكى رَد
لحظه فيها حقيقى عشت
ايوا بعدِك كنت مُت كُنت تايه وسط صحرا ولطريق النور رِجعت
افتكرنا ساعِتها قولت وقولتى ايه
كُنتى حلمى وكُنت
حِلم حلمتى بيه
كنا حُضن الحُب وشفايفُه وعينيه
كُنا ماضى جميل
فِضلنا نعيش عليه
يومها قولنا كلام
كتير منغير كلام
وف قلوبنا الحب
مارد نام وقام
قام ياخدنا للى فات
قام يصحى الذكريات
الايدين اتشبكِت غنىَ القمر
والطيور اتبسمِت فوق الشجر
والزمان ما بقاش زمان
اتملا حُب وحنان
يومها ما كانش مابيننا عتاب
حُكم البعد ما كانش بإدنا
عِشنا احباب وبعِدنا احباب
والأيام حكمِت ببعادنا
حته مِنّى ولسه مِنّى
والزمان خانِك وخاننى
وف لحظه وسط الأحلام
رجعِت أحزان الأيام
الفراق خبّط على شبكة ايديا وشبكتِك
قال لى ليك سِكه وليكى سكتِك
سِكة الماضى اللى راح
من عُمرنا
واللى عاشها كل واحد مننا
شُفت الدمع ف عينيكى
شوفتى الحزن ف عينيا
مش عايز اسيب ايديكى اللى بتحضُن ايديا
وافترقنا مَره تانيه
زى ما ف لحظه التقينا
كل واحد راح لدُنيا
بس عاش الحب فينا
شِعر / مجدى حسن